Фелікс Фёдаравіч Гумен - вядомы беларускі мастак-акварэліст.
Нарадзіўся 28 сакавіка 1941 года ў вёсцы Кальцова (Амурская вобласць, Расія).
У 1962 г. скончыў вучобу на мастацка-графічным факультэце Віцебскага педагагічнага інстытута, дзе - першым у СССР - прадставіў дыпломны праект у тэхніцы акварэлі.
Выкладаў у школах Лёзненскага і Полацкага раёнаў. З 1965-га па 1974 г. - на мастацка-графічным факультэце ў Віцебскім педагагічным інстытуце. Мастак выхаваў цэлую плеяду віцебскіх акварэлістаў, і сёння ў яго мноства вучняў і паслядоўнікаў творчасці.
Фелікс Гумен з'яўляецца адным з заснавальнікаў віцебскай акварэльнай школы. З сярэдзіны 1960-х гг. і да сённяшняга дня мастаком напісаны тысячы акварэляў ў жанрах пейзажу, партрэта і нацюрморта.
Дзейнасць Фелікса Фёдаравіча Гумена адзначана Ганаровым знакам Міністэрства культуры Рэспублікі Беларусь, медалём "За заслугі ў выяўленчым мастацтве». Мастак з'яўляецца лаўрэатам прэміі творчай інтэлігенцыі «Сузор'е муз».
Творы Фелікса Фёдаравіча Гумена знаходзяцца ў Нацыянальным мастацкім музеі Рэспублікі Беларусь, фондах Беларускага саюза мастакоў, Музеі сучаснага выяўленчага мастацтва ў Мінску, Віцебскім мастацкім музеі, Магілёўскім абласным мастацкім музеі імя. П. В. Масленікава, Нацыянальным Полацкім гісторыка-культурным музеі-запаведніку, Дырэкцыі мастацкіх выстаў Расіі, а таксама ў прыватных калекцыях Беларусі і замежных краінах.
«Акварэль - гэта маё жыццё». Юбілейная выстава Фелікса Гумена
Сёння мы прадстаўляем вам віртуальную выставу мастака і педагога Фелікса Фёдаравіча Гумена.
Выстава «Акварэль - гэта маё жыццё» падрыхтаваная да 80-гадовага юбілею майстра.
У фондах Нацыянальнага Полацкага гісторыка-культурнага музея-запаведніка захоўваецца 92 акварэльных твора аўтара, якія ахопліваюць даволі вялікі перыяд яго творчага шляху.
Экспазіцыя дазволіць прасачыць за тым, што цікавіла Фелікса Гумена, пачынаючы з канца 1960-х гадоў да сённяшніх дзён.
Дадзеная выстава пазнаёміць вас з яго паэтычнымі акварэлямі, якія валодаюць сваім характарам і энергіяй колеру, а таксама вы даведаецеся пра разнастайныя тэхнічныя прыёмы аўтара.