Напярэдадні 76-й гадавіны Вялікай Перамогі супрацоўнікі Мастацкай галерэі традыцыйна падрыхтавалі віртуальную выставу з фондаў Нацыянальнага Полацкага гісторыка-культурнага музея-запаведніка.
Выстава дэманструе падборку плакатаў і агітацыйных лістоў, якія з'яўляюцца яркім адлюстраваннем гістарычных падзей.
Без сумнення, мастацтва агітацыйнага плаката ўнесла сваю лепту ў фарміраванне пачуцця патрыятызму людзей таго часу, бо нездарма прапаганду і агітацыю тады называлі трэцім фронтам Вялікай Айчыннай вайны. Менавіта тут разгортвалася бітва за дух народа, якая ў канчатковым выніку і вырашыла зыход вайны.
Што такое плакат і для чаго ён патрэбны на вайне? Ліст плаката ўтрымлівае кідкі малюнак, загаловак або заклік. Падчас вайны плакат выкарыстоўваўся для прызыву ў войска, дапамогі параненым, а таксама падтрымання ў людзях пачуцця справядлівасці, адплаты, нянавісці да ворага.
Многія плакаты з'яўляюцца сапраўднымі шэдэўрамі плакатнай справы. Іх стварэннем займаліся таленавітыя мастакі, імёны якіх засталіся ў гісторыі выяўленчага мастацтва савецкага народа. Самымі вядомымі мастакамі дадзенага жанру былі Дзмітрый Моор, Віктар Дэні, Міхаіл Чэрэмных, Іраклій Таідзэ, Аляксей Какарэкін, Віктар Іваноў, Віктар Карэцкі і інш.
Сёння мы прапануем вам азнаёміцца як з плакатамі, якія дайшлі з франтоў Вялікай Айчыннай, так і з творамі гэтага жанру, створанымі і ў нашы дні.
