18 мая адбылося доўгачаканае і ўсімі любімае свята - міжнародная акцыя "Ноч музеяў". Арт-майстэрня "Калекцыйныя скарбы" не засталася ў баку, а разгарнула сваю дзейнасць у сцен Мастацкай галерэі, дзе ўсе жадаючыя змаглі пазнаёміцца з адным з прыёмаў працы з глінай і выканаць рэпліку з іконы 12 ст. Абразок з выявай святога Канстанціна і Алены з'яўляецца унікальнай музейнай рэдкасцю. Цікава, што яна была знойдзеная падчас правядзення археалагічных раскопак каля сцен Сафійскага сабора ў 1967 г. цяпер вядомым беларускім мастаком-керамістам, палачанінам Валянцінам Прыешкіным. Дарослыя і дзеці з захапленнем прымалі ўдзел у вырабе рэплікі і спрабавалі свае сілы ў стварэнні ўласных шэдэўраў з гліны.
